معلومات لفريق التسويق — المتجر الإلكتروني

1. عرض المنتجات مرتّب وواضح — والزبون بيطلب أكثر

كل المنتجات معروضة بصورها ومقاساتها وأحجامها، والزبون بيتصفّحها لحاله بدل ما تبعتله كل الصور والمقاسات بالرسائل.

ليش بتفرق: الزبون بيشوف أصناف أكثر، فبدل ما كان بدّه يطلب صنف واحد بيصير بدّه 2، وبدل 2 بيصير بدّه 3. وإنت ما بتضيّع وقتك تبعت صور.

2. ضبط المخزون والمبيعات والأرباح

بتربط كل صنف بكميته وسعر تكلفته. أي بيعة على الموقع — أو حتى لو زبون اشترى عالرسائل وإنت عبّيت طلبه على المتجر بطريقة سهلة — بتنخصم من المخزون لحالها.

ليش بتفرق: بتعرف قديش بعت، شو أكثر صنف بيمشي، شو ربحت من كل إشي، وكم ضايل عندك من كل صنف. بدون خربشة، وبدون ما تبيع إشي خالص.

3. مبيعات كل موظف ونسبته

بيرتّب ويبيّن مبيعات كل موظف.

ليش بتفرق: بتعرف قديش نسبة كل موظف وقديش لازم تعطيه، مين أشطر واحد، وشو أكثر منتج بيعرف يبيعه.

4. عروض ما بتقدر تعملها يدوي

"اشتري 2 والتالتة مجاناً"، خصم على أول طلب، توصيل مجاني فوق مبلغ، وغيرها — والمتجر بيحسبها لحاله.

ليش بتفرق: بتبيع أكثر، وبتخلّص بضاعة ما كانت راضية تخلص. وبالطريقة اليدوية أصلاً ما بتعملها، لأنك ما رح تعرف تحسبها للزباين ورح توجع راسك.

5. بيانات الزباين — وتسويق إلهم

بتنحفظ بيانات زباينك: مين بيشتري منك أكثر، من وين، مين بيلغي كثير، وإلخ.

ليش بتفرق: بتقدر تبعتلهم رسائل وتستفيد منهم لتبيع أكثر — زباينك القدام صاروا قائمة بترجعلها.

6. الجملة — تاجر الجملة بيطلب لحاله

كل تاجر جملة إله اسم مستخدم وكلمة سر (أو رمز)، وإنت معرّفله سعر جملة أو جملة الجملة. بيطلعله الأصناف بأسعاره هو، وبيشتري لحاله.

ليش بتفرق: ما في داعي تبعت قوائم أسعار وتاخد طلبات الجملة واحد واحد، وكل تاجر بيشوف السعر الخاص فيه بس.

7. أحسن نتائج للإعلانات الممولة (البكسل)

عن طريق البكسل، فيسبوك بيعرف شو عمل الزبون جوّا الموقع: وين وقف، شو ضاف عالسلة، اشترى ولا لأ.

ليش بتفرق: فيسبوك بيستهدف أحسن والنتائج بتتحسن مع الوقت، وبتصير تعمل حملات لناس شبه اللي اشتروا منك.

8. التوصيل بكبسة

بدل ما تقعد تدخّل معلومات كل زبون على تطبيق شركة التوصيل، بتكبس كبسة وبتلاقي كل معلومات الزبون صارت عند الشركة.

ليش بتفرق: بيوفّر وقت بلاوي، وبيقلّل الغلطات بالعناوين والأرقام.

9. ترتيب شغل الموظفين على الرسائل

إذا الموظفين دخّلوا الطلبات على المتجر، بيبعتوا ملخص واضح للزبون، وإنت بتعرف مين عدّل على الطلب وشو دخّل. وبيساعدهم بالتحضير: بيسجّلوا عن طريق الكاميرا كم حبة حضّروا.

ليش بتفرق: طلبات أقل بتضيع أو بتتلخبط، ملاحظات الزبون (لون، مقاس، وقت تسليم) ما بتنتسى، وتحضير أسرع وغلطات أقل.

10. ثقة وانطباع أحسن

وجود متجر بيعطي انطباع ممتاز عن شغلك، لأنه مش أي حدا بيعمل متجر.

ليش بتفرق: الزبون بيثق أكثر إنك مش فاتح عشان تبيع وتهرب — وهاد بيخليه يشتري أسهل، خصوصاً أول مرة.

11. الدفع الإلكتروني بيجيب زباين زيادة

الزبون بيقدر يدفع بالفيزا أو أبل باي.

ليش بتفرق: في زباين بيحبوا يدفعوا إلكتروني لأنهم مش حاملين كاش أو لأي سبب تاني — خصوصاً أهلنا بالداخل. بتجربتنا تقريباً طلب من كل 10 بيندفع فيزا، وغالباً هاد زبون جديد ما كان رح يشتري لأنه مش قادر يدفع فيزا — يعني كنت خسرانه وإنت مش عارف. وكمان بيقلّل الطلبات الراجعة، لأنه جزء كبير من المرتجع سببه إنه الزبون ما معه كاش وقت الاستلام.

12. المتجر بيشتغل عنك طول الوقت

شغّال 24 ساعة، والزبون بيطلب لحاله حتى لو إنت مشغول أو نايم.

ليش بتفرق: إذا تأخرت على الزبون شوية صغيرة، بتلاقيه راح على غيرك. خلّي المتجر يرجّعلك زبون واحد من هالنوع كل يوم أو حتى كل شهر، وخلّي طلبه بس 100 شيكل — تخيّل قديش رح يرجعلك من هاي الحركة لحالها.

13. السلات المتروكة — بتعرف شو بدهم الزباين

بتعرف الزباين شو بدها وشو وضعها: عم تشتري ولا بس عم تتفرج، وعلى شو عم تتفرج.

ليش بتفرق: بتعرف الناس بإيش مهتمة هلأ، فبتعرف شو تجيب وعلى شو تعمل عرض.

14. السلات المتروكة — بترجّع طلبات ضايعة

لما زبون يترك منتج بالسلة ويترك معلوماته — كان بدّه يشتري بس تردد، أو إجته مكالمة، أو التهى — إنت عندك معلوماته وبتقدر تتواصل معه يكمّل طلبه.

ليش بتفرق: لو رجّعت طلب واحد بالشهر بـ200 شيكل = 2,400 شيكل بالسنة — يعني تقريباً حق 3 متاجر من سلة وحدة بالشهر. والواقع أكثر بكثير.

مشاكل التجار بكلامهم

• "الأوردرات بتضيع"، تأخير بالتسليم، ملاحظات منسية (لون معيّن، وقت تسليم، بديل لصنف خالص).
• الموظفين بيسألوا كل شوي: "هالصنف موجود؟ هاللون متوفّر؟" — ومع 20–30 صنف صعب تتذكر تفاصيل كل زبون.
• "الرد على الرسائل مُهلك" — الزبون بيبعت بالوقت اللي بيناسبه، وبدّك ترد بوقته.
• "ما في سيطرة على المخزون"، وأصناف ما بتاخد حقها بالعرض.
• "بعبّي معلومات كل طلب بإيدي عند شركة التوصيل".
• "بعتلك صور وأسعار المنتجات لكل زبون لحاله".
• "شغّال لحالي وما عندي وقت ولا موظفين".
• "زبون سأل واختفى قبل ما يطلب".

"لقيت أرخص" / "واحد بيعملّي ياه بـ1500 مرة وحدة"

مين بيصلّح بعد سنة؟ (شوف جواب الاشتراك السنوي). وبنفضّل ما نترك التاجر يقارن لحاله: بنفهم بإيش بيقارن ووين محتار، وبنربط كل ميزة بالمصاري اللي بتجيبها — السلات المتروكة بتزيدلك كذا، العروض كذا، الدفع الإلكتروني كذا.

"زبايني بيحبوا يسألوا ويعدّلوا عالواتساب — المتجر رح يخفّف البيع"

بالعكس، المتجر رح يرتّب الرسائل. بدل ما تكون بالرسائل مش عارف وين رقم الزبون ووين طلبه، المتجر بيعطيك رابط تبعته للزبون فيه ملخص طلبه كامل، واضح وسهل، وبيقدر يرجعله. لما يجي يسألك "شو صار بالطلب؟"، بدل ما يسألك بيفوت وبيشوف.

بتعرف كل طلبية لمين، وشو رقم زبونها، وتفاصيلها كاملة. فهو بيرتّبلك شغل الرسائل، وبيريحك من ضغط رسائل ما إلها معنى، وبيخليك ما تخسر رسالة مهمة من شخص بدّه بس يسأل "شو الألوان الموجودة؟" أو "شو السعر؟".

"الناس عنا (بالضفة / بمنطقتي) لسا مش متعوّدة تشتري من متجر"

بنفهم أول شو بيبيع وشو طبيعة مجاله، وإذا عنا تجار بنفس شغله. ممكن جزء من زباينه ما بيحبوا يشتروا من متجر — بس في زباين بيحبوا يشتروا من متجر، والدليل إنهم موجودين عند زباين إلنا بنفس مجاله. يعني في ناس هو خسرانهم لأنه ما عنده متجر. إنه زباينه ما بيستعملوا المتجر، مش معناه إنه الناس ما بتستعمله.
وكمان: أكثر البيع على متاجر التجار عنا بيكون لأهلنا بالداخل.

"بيعي أونلاين قليل وصفحتي ضعيفة" / "بدي أشتغل على الإعلانات أول"

إذا هو جاي على أمل إنه المتجر لحاله يجيبله زباين — مش الشخص اللي رح تزيد مبيعاته، وإحنا منفضّل نكون صريحين معه. بس إذا فاهم إنه الزباين بيجيبهم التسويق، فالمتجر بحالته مرحلة أولى بتخلّي مشروعه منظّم ومرتّب من أول يوم، عشان لما يكبر، يكبر صح بدون مشاكل. والمتجر والإعلانات بيكمّلوا بعض: الإعلان بيجيب الزبون، والمتجر بيخلّيه يشتري، والبكسل بيحسّن الإعلان.

"الوضع الاقتصادي صعب، مش وقت نستثمر" / "البيع نزل"

إحنا شايفين إنه الناس عم تبيع أونلاين منيح بالبلد حالياً، وشركات التوصيل شغّالة. حتى مع هالظروف في طرق. فإذا الأونلاين عند التاجر ضعيف، فالمشكلة عنده ولازم يطوّر حاله فيه — والمتجر بيفتحله باب للزبون اللي ما بيوصل المحل.

"أصحاب محلات جرّبوا وقالوا ما استفدنا"

كل سنة في محلات بتفتح ومحلات بتسكّر. إذا ناس ما نجحت، مش معناه إنه الفكرة فاشلة — وإلا ما حدا كان فتح محل. كم محل فتح وصار بدل الفرع عشرة، وكم واحد فتح عشر فروع مرة وحدة وسكّرهم كلهم. تجارب الناس السيئة غالباً إلها علاقة بطريقتهم بالتنفيذ وجدّيتهم والتزامهم، مش بالفكرة. ليش نطّلع على اللي فشلوا وما نطّلع على اللي نجحوا وعم بيكبروا وعملوا ترقية؟

"جرّبت متجر قبل وما زبط" / "شركات وعدتني وما نفّذت، خايف تتركوني"

ما في جواب واحد صح. بنسأل كثير لنفهم شو صار: هل كان بيبيع أونلاين؟ كيف كان شكل متجره؟ ليش فشل؟ غالباً هو مش عارف السبب، بس من الأسئلة بيبيّن. عنا تجار كثير جرّبوا أشياء قبل وما زبطت، ولما إجوا عنا زبطت.

• بنفرجيه الأمثلة اللي رح ياخد زيّها بالزبط، وبنسأله شو اللي أخلفوا فيه معه، عشان نقوله من البداية بنقدر ولا لا.
• بنشجّع كثير إنه يسأل تجار شغّالين معنا، وبنعطيه أرقامهم.
• عنا تجار بيجدّدوا معنا سنة ورا سنة، وأسماء معروفة.
• بالعقد مكتوب إنه لو الشركة سكّرت، علينا نرجّعله الكود عشان ما يتعطّل ويكمّل شغله عادي.

"عندي منتجات كثيرة (مئات أو 1500 صنف)، إدخالها وتصويرها تعب"

الموضوع بدّه وقت، مش صعوبة: المنتج بياخد تقريباً دقيقتين إذا صوره جاهزة، يعني حدا معطي وقت للموضوع بيدخّل 70–90 منتج باليوم بسهولة. ومش ضروري يدخّل كل إشي مرة وحدة عشان يبلّش — بيبلّش بالمنتجات المهمة أو البضاعة الجديدة. وإذا منتجاته موجودة على متجر قديم، منسحبها.
والأهم: هاد إشي لازم يصير عشان يواكب المستقبل. إذا ما عمل هالقرار هلأ، إمتى رح يعمله؟ بعد ما تكون راحت عليه؟ بيقدر يوظّف حدا أو يشغّل حدا — الإشي سهل، بدّه بس وقت.

"أصنافي قليلة (20 صنف)، المتجر مش إلي"

عنا تجار منتجاتهم أقل من هيك، وبيستعملوا المتجر عشان يرتّبوا وينظّموا شغلهم، ويسهّلوا على حالهم وعلى زباينهم، ويعرفوا قديش باعوا واشتروا، ويخففوا الرد عالرسائل.
وبما إنه المنتجات قليلة، بيقدر يخلّي الموقع ممتاز ومليان معلومات — بحيث الزبون يلاقي جواب كل أسئلته، وما يستنّى رد، ويشتري مباشرة وهو متحمّس.

"المتجر رفاهية، بدّه طاقم ومتابعة وأنا ما عندي" / "بدي حدا يدير عني"

المتجر مش مناسب للي ما بدّه يتعب أبداً — بدّه حدا يدير ويسوّق ويصوّر عنه. بس إدارة المتجر نفسها سهلة: من الجوال، وفي تجار بيبيعوا كثير وما بيستعملوا غير الجوال. "إذا بتعرف تستخدم جوالك، بتعرف تستخدم المتجر" — بتضيف منتج، بتغيّر سعر، بتتابع الطلبات. ومش لازم يكون بيفهم بالكمبيوتر.

"عنا ناس للتسويق والسوشال ميديا، مش محتاجين متجر"

ليش افترضت إنك مش محتاج متجر؟ فريق التسويق بيجيب الزبون — والمتجر هو المكان اللي بيشتري فيه، وبيخلّي شغل الفريق يجيب نتيجة أحسن (البكسل، العروض، السلات المتروكة). أول مرة بنسمع إنه في حدا مش محتاج يكبّر مبيعاته ويطوّر شغله.

"الدفع الإلكتروني مش مستخدم عنا" / "ما عندي حساب تجاري" / "خايف من الضريبة"

• مستخدم أكيد. بالعكس، في ناس كثير عم تيجي من متاجر تانية بس لأنها مش قادرة تفعّله. بالمتوسط، من كل 10 طلبات واحد فيزا، وعملياً هاد زبون جديد ما كان رح يشتري.
• ما عنده حساب تجاري؟ بيقدر يبلّش بدون دفع إلكتروني ويضيفه بأي وقت — وهيك بيكسب وقت.
• الضريبة: الأسعار بدون ضريبة، والضريبة بس إذا طلب فاتورة ضريبية (عادةً الشركات الكبيرة). وما في داعي يفعّل الدفع الإلكتروني إذا مش بدّه.

"التطبيق بيستاهل؟ مش كل الناس بتنزّل تطبيق"

التطبيق إله فايدة وحدة بتفرّقه عن الموقع: الإشعارات — وصول مجاني للزبون بأي وقت بدون إعلانات (منتج رجع توفّر، منتج جديد، عرض محدود، مناسبات). إذا التاجر معني على المدى البعيد يبعت إشعارات، فالتطبيق استثمار مفيد. بس هو أصعب بالتسويق: لازم تقنع الزبون يفتح متجر التطبيقات، وينزّله، وبعدين يفتحه. فإذا الإشعارات ما بتفيده عملياً، الموقع أسهل إله وللزبون — بمجرد ما يكبس عالإعلان بيفتح.

"منتجاتي بدها قياسات وتفاصيل وتواصل" / "شغلي حسب الطلب"

إذا فعلاً ما بيلزمه متجر، ما في داعي نقنعه. بس بنفهم أكثر أول: في أصناف بتتوصّل؟ الزبون بيدوّر أونلاين قبل ما ييجي المحل؟ (وبالمتجر بيقدر يميّز بين منتج جاهز للتسليم ومنتج بيتوفّر بعد الطلب، ويضيف أسئلة وخيارات عالطلب.)

"خايف على بياناتي وفكرة مشروعي"

ما حدا عنده وصول لمتجرك وبياناتك غيرك. البيانات مشفّرة، ومخزّنة على سيرفرات عالمية برّا البلد، وفي نسخ احتياطي دائم.

"خايف تملّوا من أسئلتي" / "إذا الموقع علّق وزباني ما قدروا يفتحوا؟"

أي سؤال بنجاوب عليه — يا بفيديو بيشرح، يا إذا ما وضح بنساعد على الرسائل لحد ما يوصل للنتيجة. وأي مشكلة بتنبعت عالجروب بتتعالج — عادةً ما في مشكلة بتاخد أكثر من 5–10 دقايق، خصوصاً إذا موقّفة المتجر. الأولوية دايماً لأي إشي بيعطّل زباين التاجر.

"عندي متجر عند حدا ثاني"

ما في أي مشكلة، وما بننتقد الموجود. السؤال الوحيد: "حاسس إنه ناقصك إشي بمتجرك الحالي؟" — وإذا قرّب يخلص اشتراكه، ممكن يحب يعرف شو المميّز عنا. النقل: يومين–ثلاثة، والكميات بتنضبط بدون خلل.

كيف بيبلّش التاجر

1. بيدفع الاشتراك.
2. بينعمله جروب واتساب مع فريق نجاح التجار، وبيبعت شعاره ومعلومات بسيطة.
3. خلال 24 ساعة بيستلم متجره + فيديوهات تدريب مفصّلة + مساعدة على الواتساب.
4. بيدخّل منتجاته وبيبلّش يبيع.

تكاليف إضافية

• رسائل SMS بعد الـ500 الهدية: 150 ₪ لكل 1000 رسالة (اختياري).
• الضريبة — بس إذا طلب فاتورة ضريبية.
• عمولة البنك على الدفع بالفيزا — للبنك، وبيقدر يحمّلها على الزبون.

ومش موجود بأي باقة

• إدخال المنتجات عن التاجر.
• إعلانات ممولة، إدارة صفحات، تصوير، تصميم لوجو.
• ضمان مبيعات.
• منيو مطاعم، كورسات ومنتجات رقمية، دروبشيبينغ، شحن من الصين، حجز مواعيد، أسعار ذهب تلقائية.
• رابط أو بوابة دفع بدون متجر.
• برنامج محاسبة (سندات قبض وصرف ومشتريات).
• مواقع أو تطبيقات أو أنظمة خاصة — عن طريق شركة شريكة، تبدأ من 1500 $.